തച്ചു ശാപം

ഒരു സ്ഥപതി ആരാണ് എന്ന് കഴിഞ്ഞ പല ലേഖനങ്ങളില്‍ നിന്ന് നിങ്ങള്‍ക്ക് വ്യക്തമായിട്ടുണ്ട്. ഒരു ഗൃഹം നിര്‍മ്മിക്കുന്നതിന് ഒരു ചിന്ത മനസിലുണ്ടാകുമ്പോഴെ ഒരു വാസ്തു കണ്‍സള്‍ട്ടന്റിനെ (സ്ഥപതിയെ) സമീപിയ്ക്കുകയാണ് വേണ്ടത്. ജ്യോതിഷശാസ്ത്രം കൂടി കൈകാര്യം ചെയ്യുന്ന ഒരു സ്ഥപതിക്ക് നിങ്ങള്‍ സ്ഥലം വാങ്ങുന്നതിന് സമയമായോ, നിലവിലുള്ള സ്ഥലത്ത് വീട് നിര്‍മ്മിക്കാനുള്ള സമയമായോ എന്ന് ആദ്യമേ ചിന്തിച്ച് പറയാനാകും. ഗൃഹനിര്‍മ്മാണത്തിന് പറ്റിയസമയം ആണ് എന്ന് മനസിലാക്കി കഴിഞ്ഞാല്‍ ഗൃഹനിര്‍മ്മാണത്തിന് പറ്റിയ ഭൂമി തിരഞ്ഞെടുക്കുകയാണ് വേണ്ടത്. ഭൂമിയുടെ സവിശേഷതകള്‍ കണ്ടറിഞ്ഞ് സ്ഥാന നിര്‍ണ്ണയം നടത്തുന്നതിനും, സ്ഥാന നിര്‍ണ്ണയം നടത്തിയ ഭാഗത്ത് വാസ്തുശാസ്ത്രം അനുശാസിക്കുന്ന ചുറ്റളവുകളോടെ, മുറികളുടെ സ്ഥാനം നിര്‍ണ്ണയിച്ച് വീടിന്റെ രൂപരേഖ തയ്യാറാക്കുന്നതിനും സ്ഥപതിയുടെ നിര്‍ദ്ദേശങ്ങള്‍ സ്വീകരിക്കേണ്ടതാണ്. തയ്യാറാക്കിയ രൂപരേഖപ്രകാരം ഭൂമിയില്‍ കുറ്റിയടിച്ച്, ആദ്യശിലസ്ഥാപിച്ച് വീട്പണിയുടെ വിവിധ ഘട്ടങ്ങളില്‍ സ്ഥപതിയുടെ നിര്‍ദ്ദേശങ്ങള്‍ സ്വീകരിച്ച് വേണം ഗൃഹനിര്‍മ്മാണം പൂര്‍ത്തിയാക്കുവാന്‍, ചുരുക്കിപറഞ്ഞാല്‍ വീട് നിര്‍മ്മാണം ഒരു ചിന്തയായി മനസില്‍ വരുമ്പോള്‍ മുതല്‍ വീട് നിര്‍മ്മാണം പൂര്‍ത്തിയായി വീട്ടില്‍ ഗൃഹപ്രവേശനകര്‍മ്മം പൂര്‍ത്തിയാക്കി കഴിഞ്ഞാല്‍ മാത്രമാണ് ഒരു സ്ഥപതിയുടെ കര്‍മ്മം പൂര്‍ത്തിയാവുക. ഇപ്പോള്‍ പതിവായികണ്ടുവരുന്ന ശീലം താഴെ പറയും പ്രകാരമാണ്. ഏതെങ്കിലും എഞ്ചിനീയറിനെകൊണ്ടു വരപ്പിച്ച വീടിന്റെ രൂപരേഖ ഒരു വാസ്തു കണ്‍സള്‍ട്ടണ്ടിനെക്കൊണ്ട് കൃത്യമാക്കിയെടുത്ത് വീട് പണി തുടങ്ങുന്നു. സ്ഥപതി നിര്‍ദ്ദേശിച്ച ചുറ്റളവുകളിലും, മുറികളുടെ സ്ഥാനത്തിലും എല്ലാം നിര്‍മ്മാണഘട്ടത്തില്‍ മനപൂര്‍വ്വമോ അറിയാതെയോ മാറ്റം വരുത്തുന്നു. ആ മാറ്റങ്ങള്‍ ദോഷഫലങ്ങള്‍ നല്‍കും. ഫലത്തില്‍ ഒരു വാസ്തു കണ്‍സള്‍ട്ടന്റ് (സ്ഥപതി)യുടെ നിര്‍ദ്ദേശങ്ങള്‍ സ്വീകരിക്കുന്നു എങ്കില്‍ ആയത് വീടുപണിയുടെ ആദ്യഘട്ടംമുതല്‍ അന്തിമ ഘട്ടം വരെയായിരിക്കണം. ചില സാഹചര്യങ്ങളില്‍ സ്ഥപതി, സൂത്രഗ്രാഹി എന്നിവരുമായി വീട്ടുടമസ്ഥന്‍ സ്വരച്ചേര്‍ച്ച ഇല്ലാതെ പെരുമാറുകയും, വീണ്ടും പുതിയ ആളുകളെ കണ്ടെത്തി വീടു നിര്‍മ്മാണം പൂര്‍ത്തീകരിക്കുന്നതും കണ്ടു വരുന്നു. സ്ഥപതി, സൂത്രഗ്രാഹി എന്നിവരുടെ അസംതൃപ്തി തങ്ങളുടെ വീടിനെ ദോഷകരമായി ബാധിക്കുമെന്ന് വീട്ടുടമസ്ഥന്‍ മനസ്സിലാക്കുന്നില്ല. നാട്ടുനടപ്പനുസരിച്ച് സ്ഥപതിക്കും, സൂര്യഗ്രാഹിക്കും, മറ്റ് മേസതരിമാര്‍ എന്നിവര്‍ക്കും ദക്ഷിണ, വസ്ത്രങ്ങള്‍, എന്നിവ നല്‍കി മനസന്തോഷം വരുത്തേണ്ടതും വീട്ടുടമസ്ഥന്റെ കടമയാണ്. മുകളില്‍ പരാമര്‍ശിച്ച കാരണങ്ങള്‍ ഏത് കൊണ്ടും വീടിന് ഏല്‍ക്കുന്ന ശാപത്തെ തച്ച് ശാപം എന്നു പറയുന്നു. തച്ച് ശാപം കൂടാതെ വീട് നിര്‍മ്മാണം പൂര്‍ത്തിയാക്കുവാന്‍ ഗൃഹവാസികള്‍ ശ്രദ്ധിക്കേണ്ടതാണ്. തച്ചുശാപം ഏറ്റ് ദോഷം സംഭവിച്ചുള്ള വീടുകളില്‍ പരിഹാരം ചെയ്ത് തച്ച് ശാപം മാറ്റിയെടുക്കുന്നതിനും ഒരു അനുഗ്രഹീത സ്ഥപതി (വാസ്തു കണ്‍സള്‍ട്ടന്റിന്)യ്ക്ക് കഴിയും ദോഷരഹിതമായ ഒരു സുന്ദരഭവനമാകട്ടെ നിങ്ങളുടെ സ്വപ്നം എന്ന് ആശംസിക്കുന്നു.